EPI preparando pa apertura di OLC.

Colegio EPI ta trahando ariba e ultimo detallesnan pa finaliza cu e ultimo fase di e proyecto di integracion di Colegio EPI cual ta e Open Leercentrum (OLC). E edificio di mas nobo di e campus di Colegio EPI na Seroe Blanco ta planea pa hasi su apertura oficial na comienzo di aña escolar nobo 2009-2010. Mientrastanto e ICT-Team di Colegio EPI ta staciona den e OLC y ta activamente trahando ariba planificacion y desaroyo di procedura di ICT pa OLC y tambe pa tur e unidadnan y departamentonan di Colegio EPI.

E OLC di EPI, aparte di ta un edificio grandi y moderno, ta un area especificamente diseña pa crea un ambiente di estudio positivo, caminda cu studiantenan por (siña) studia independiente. Tin diferente area di trabou den e OLC caminda cu studiantenan lo por traha ariba nan projecto di scol sea den grupo of individual. Tambe tin oportunidad pa hasi sondeo via Internet y mediatheek. Esakinan tur por sosode segun necesidad bou guia di docente pero tambe ariba nan mes.



E OLC lo ta disponibel pa uso despues di scol of ora di pauze y den oranan liber, caminda e studiante por hasi uso di e facilidadnan pa traha huiswerk of studia un cierto materia sea online (e-learning) of via materialnan y bukinan di e OLC.

Den e concepto di OLC tin e posibilidad pa brinda worshop di materianan ariba tereno di idioma, personalidad y temanan adicional pa yuda e studiante den su estudio. Tambe e OLC lo fungi como lugar pa duna cursonan na docentenan y empleadonan di Colegio EPI.

Den e OLC lo ofrece servicionan manera: un reproruimte caminda studiantenan lo por busca nan ‘diktaten’ y hasi copia, bind in verslagen y cumpra diferente articulo di scol, un stagebureau caminda lo yuda studiantenan haña nan stageplek y un loopbaanbegeleidingcentrum pa yuda studiantenan e.o. cu nan escogencia di estudio superior.

E sociaal maatschappelijk werker lo ta disponibel pa brinda e guia ariba tereno sociaal y emocional na e studiantenan y personal di EPI.

Banda di esaki e edificio di OLC lo tin na su disposicion un Internet Café caminda cu na un manera mas social y casual studiantenan por intercambia idea, check nan email, surf internet y alavez come of bebe algo.