Celebra cu nos 50 aña di Colegio Arubano!

E aña escolar aki Colegio Arubano ta celebra su hubileo di oro. Un motibo grandi pa pone e scol riba e portada festivo. Docente y alumnonan ta trahando incansabel na un seri di actividad cu seguramente lo laga su marca atras cerca hopi di nos hendenan cu ta y a yega di bishita e scol.

Porfin na aña 1959 Aruba a conoce su prome scol riba nivel di HBS (nivel secundario di educacion) y por a ubica studiantenan cu a caba nan MULO. E tempo ey a cuminsa cu algun klas den un barak riba tereno di Maria College.

Despues di a caba MULO algun hoben por a sigui nan estudio secundario na Colegio Arubano prome cu nan a sigui nan estudio universitario den exterior. Den e aña ey Colegio Arubano a cuminsa cu 113 alumno y 13 docente.

Na aña 1962 Colegio Arubano cu ya a conoce un expansion grandi den su comunidad escolar a haya su ubicacion permanente den Vondellaan. Te cu aña 1968 Colegio Arubano tabata existi di un nivel HBS-A y HBS-B y un departamento pa prepara maestronan pa duna les na scol basico. Na 1977 e parti fisico di Colegio Arubano a conoce otro crecemento grandi y a habri un dependance na San Nicolas.

Durante 5 decada Colegio Arubano tawata e pionero den formacion di hopi profesional riba diferente tereno prominente y crucial riba nos isla y tambe den exterior. Orguyosamente por bisa cu tur dia e alumnonan y ex alumnonan ta aporta na e progreso di país Aruba. Nos tin alumnonan cu a destaca riba tereno artístico, di deporte, di sciencia y mucho mas. E entusiasmo y dinamismo di e alumno y docentenan no ta unicamente visibel den localnan di Colegio Arubano pero tambe pafo. Colegio Arubano a forma parti di Carnaval di Aruba pa varios aña compitiendo cu reina hubenil y grandi y tambe participando den parada di Aruba su Carnaval.

50 aña despues e comunidad escolar di Colegio Arubano a crece y bira mas di binti biaha mas grandi cu na su inicio y ta awendia un scol grandi cu ta abarca 2500 alumno y 130 docente.

Pa conmemora e celebracion di oro di Colegio Arubano docente Nigel Matthew a diseña un emblema. Riba e emblema por aprecia e cifra 50 color di oro cu ta enfoka e hubileo cu nos ta celebra. Riba e emblema tin un parti di historia di scol cual ta simbolisa pa nubia y e rayonan di solo. Esey tambe ta reconocibel riba nos emblema di scol actual. Riba un liña diagonal, di robes pa drechi, cuminsando di abou tin algun papel cu ta waya bay direccion ariba. Esaki ta simbolisa conocemento y estudio di presente pa futuro. E papelnan cu ta waya ta simbolisa nos enseñanza cu ta den continuo desaroyo y cu lo sigui desaroya den futuro.

Convenci cu e trayectoria di existencia aki a contribui na formacion y desaroyo intelectual di hopi Arubiano, Colegio Arubano no ta keda atras y kier bin cu un seri di actividad unda e comunidad cu ta y tabata forma Colegio Arubano lo ta involvi.

Durante henter e aña escolar Cologio Arubano lo briya cu su celebracion di 50 aña cu algun actividad pa recauda fondo pero tambe lo tin algun actividad social y educativo.

Actividadnan a inicia den luna di september unda nos tabatin diferente celebración eucarístico y lo sigui den luna di october cu un caminata dia 17, saliendo for di scol cu un duracion di aproximadamente 7 km. Esaki lo hiba e tema ´´Walk with a friend´´. E costo pa e caminata lo ta afls. 10,00 y esaki ta encera tambe un t-shirt cu emblema di e hubileo y un boter di awa.

Dia 25 di october lo celebra un encuentro religioso riba e plaza Evento na Colegio Arubano pa 6or.

Den luna di december lo organisa e tan gusta feria di Colegio Arubano.

Durante aña lo tin tambe un musical prepara y presenta pa docente y alumnonan di scol y tambe algun otro evento pa recauda fondo. E eventonan aki ta e.o. bendemento di rifa, lo tin tambe un tienda cu lo bende articulonan conmemorativo cu emblema di lustro. Lo tin pa e alumnonan un sciencefair unda cu nan lo demostra nan talento riba tereno scientifico y despues lo pone un exebicion pa publico por aprecia e trabounan.

Pa clausura e ciclo di actividadnan festivo lo tin un fiesta di gala caminda lo inaugura e buki di 50 aña di existencia di Colegio Arubano.

Esnan cu ta desea di yuda nos cu un contribucion por haci esaki pa medio di nos cuenta di lustro via banco RBTT number 12.50.388.

Un y tur cu ta forma of a yega di forma parti di e famia di Colegio Arubano ta keda invita pa asisti na e actividadnan cu nos lo tin y pa coopera cu nos pa nos por logra nos meta di genera placa pa cumpra airco pa scol y conhuntamente celebra e lustro di oro e aña aki cu nos.