Otorgacion di beca pa 22 studiantenan nobo di "United World Colleges'
Tuesday, 23 June 2009 - 08:38
Recientemente Minister Plenipotenciario sr. Croes a hanja un invitacion di “United World Colleges” pa ta presente durante otorgacion di beca pa 22 studiantenan nobo di “United World Colleges”. Un di e 22 studiantenan cu a ricibi un beca e atardi aki na “Vredespaleis” na Den Haag, ta e studiante Arubiano srta. Zytha Kock.
Durante e atardi aki tabata presente Su Altesa Real Principe Willem Alexander, cu ta graduado di “United World College” y alabez ta patrosinado di “United World Colleges” na Hulanda. Tambe tabata presente sra. van Bijsterveldt, Secretario di Estado pa Ensenansa, Cultura y Siensa.“United World Colleges” ta haci uso di enseñansa colectivo pa stimula nan studiantenan cu tin encomun cu nan ta entre e edad di 16 te cu 18 anja, ta prosedente di differente pais y tin differente cultura. Pa medio di differente experencianan, por ejemplo den e ramo social y academico, e studiantenan lo wordo inspira pa den futuro haci cambionan positivo pa nan comunidad. Pesey mes “United World Colleges” ta concentra hopi riba nan “maatschappelijke stages”.E 22 alumnonan a wordo escogi na Hulanda, Aruba y Antias. E beca nan di “United World Colleges” ta wordo financia pa differente instancia manera sponser, gobierno, empresa y fundacion. E prome scol di “United World Colleges” a habri su porta na 1962 na Wales. Awor “United World Colleges” ta consisti di 11 scol den henter mundo. Na september 2009 e prome “United World College” di Hulanda lo habri su portanan na e cuidad di Maastricht.Zytha Kock ta studiante prometedor di Colegio Arubano y den e proximo anja escolar elo atende “United World College” na Italia. Zytha a conta cu e ta sumamente orguyoso di a wordo escogi pa e beca aki. Zytha: “E motibo cu mi tin asina hopi animo pa cuminsa na “United World Colleges” ta pasobra mi ta entusiasma pa por comparti mi experiencianan y sinja di e experiencianan di e otro studiantenan, pa asina hunto nos por traha riba experiencienan nobo.”Despues di e ceremonia a sigi un celebracion hopi ameno cu mayornan, amigonan y sponsernan.Finalmente Minister Plenipotenciario sr. Croes a bisa di ta contento di por tabata tey presente na e atardi aki y na mes momento a desea Zytha Kock hopi exito cu su estudio na Italia.
