Uit: Bon Dia Aruba		02-03-2009
Studiantenan a protesta contra di maneho di Colegio Arubano pa cu e “gecoördineerde toetsen”
 
ORANJESTAD – Ayera alrededor di 9’or pa 11’or di mainta e studiantenan di Colegio Arubano a bai protesta contra di directiva di Colegio Aruba, basa riba e hecho cu nan no ta di acuerdo cu e forma cu a introduci e “gecoördineerde toetsen” (GT). E studiantenan ta haya cu nan ta hopi mal organisa y cu e ta hopi di biaha despues di e CP y esaki no ta duna e studiantenan suficiente tempo pa nan siña suficiente pa nan haya bon resultado.
E precupacionnan aki a bai na director di Colegio Arubano den un carta cu tur e puntonan di esaki y nan ta spera cu nan por haci algo cu e precupacion aki. 
GT ta cu bo enves bo tin proefwerk nan los los, bo tin tur den un siman y cada dos siman y riba cada dia bo tin cu siña pa e proefwerk y na mes momento bo tin huiswerk pa haci y bo tin proyecto pa entrega y e ta bira hopi dificil pa e studiantenan, y naturalmente e resultado no lo ta uno satisfactorio.
Loke e studiantenan kier ta pa Directiva di Colegio Arubano drecha esaki miho y no pone 5 proefwerk den un siman y pa nan haci’e tres, pa nan cordina esaki mas miho y bisa di hopi antemano ki dia e siman di GT aki ta, paso na ta bisa e studiantenan tres dia prome. E studiantenan a bisa cu loke na kier ta pa nan bai bek na e forma con e tabata antes.
E structura manera cu e ta actualmente e ta un bon idea, paso tur e klasnan ta haya e mesun proefwerknan y esei ta bon, pero e directiva mester plania esaki miho y cuanto proefwerk pa dia. E studiantenan a haya un cantidad grandi di firma di e studiantenan cu ta precupa y ainda nan ta colectando firma y e carta aki na ta bai manda pa e director.

E studiantenan kier pa e cambio aki tuma luga mesora, paso e ta perhudicando nan estudio y e ta hopi pisa pa nan, paso nan tin cu siña pa hopi proefwerk na mes momento, y e ta demasiado riba otro y e no ta duna oportunidad na e studiantenan pa nan siña pa tur e materianan na un forma corecto. E ta dune studiantenan hopi mas stress.
E tempo cu nan ta duna di GT pa GT ta demasiado tiki, paso nan ta duna un GT un siman, despues un siman di les y atrobe un siman di GT atrobe y esei ta loke e studiantenan ta haya demasiado dimas. E studiantenan ta haya cu nan tin suficiente stress caba cu huiswerk, proyecto cu nan tin pa entrega y otro trabounan cu nan mester haci pa scol y cu e GT nan di e forma cu e ta cordina actualmente ta duna e studiantenan mas stress di loke nan tin actualmente.
E studiantenan ta spera cu e directiva di e scol por tene na consideracion nan puntonan y asina haci un cambio pa suavisa e peso cu a pone riba e studiantenan. E accion di e studiantenan a dura te cu 11’or di mainta, mustrando asina nan malcontento